काठमाडौं । सिन्धुपाल्चोकको बाह्रबिसे नगरपालिकामा अख्तियार दुरुपयोग अनुसन्धान आयोगको टोलीले छापा मारेको छ ।
आइतबार अख्तियारको विशेष टोलीले नगरपालिकाको कार्यालयमा छापा हानेर केही कागजातहरू नियन्त्रणमा लिएको अख्तियार स्रोतले जनाएको छ ।
नगरपालिकामा अनियमितता भएको भन्ने पटकपटक गुनासो तथा उजुरी आएपछि अख्तियारले आइतबार छापा मारेको हो ।
भोटेकोशी जलविद्युत् आयोजनासँग अस्पताल निर्माणका लागि भन्दै नगरपालिकाका प्रतिनिधिले ५ करोड रुपैयाँ लिएको तर उक्त रकम अस्पताल निर्माणमा नलगाई अन्यत्र हिनामिना गरेको भन्ने सूचना आएपछि अख्तियारको टोली खटिएको थियो ।
अख्तियारले छापा मार्दा २० लाख रुपैयाँ बराबरको हिसाब भेटिए पनि बाँकी रकमबारे केही पनि कागजात नभेटिएको बताइएको छ ।
पछिल्लोपटक जेनजीको नाममा भोटेकोसी जलविद्युत आयोजनामा १० प्रतिशत निशुल्क सेयर माग गरि एक महिनासम्म आयोजना बन्द गराइएको थियोे । अन्तत आयोजनाले १०० रुपैयाँका दरले सेयर दिने सम्झौता गरेपछि आयोजना सञ्चालनमा आएको थियोे ।
