वासिङ्टन। अमेरिकी राष्ट्रपति डोनाल्ड ट्रम्पले आप्रवासन नीति, कर कटौती र आर्थिक विकासका विषयमा डेमोक्र्याटिक पार्टीका सांसदहरूसँग मिलेर काम गर्न सकिने बताएका छन्।
अमेरिकामा भएको मध्यावधि निर्वाचनमा रिपब्लिकन पार्टीले अपेक्षाकृत कमजोर नतिजा ल्याएपछि ट्रम्पले विपक्षी दलसँग सहकार्यको सम्भावना खुला गरेका हुन्। उनले दुवै दलबीच सहमति हुन सक्ने विषयमा मिलेर काम गर्न आफू तयार रहेको संकेत दिएका छन्।
पत्रकारहरूले डेमोक्र्याटहरूले अघि सारेका कुनकुन योजनालाई समर्थन गर्न सक्नुहुन्छ भनेर सोध्दा ट्रम्पले आप्रवासन, कर कटौती र आर्थिक विकासका विषयमा सहकार्य गर्न सकिने बताए।
‘धेरै विषयमा सहकार्य गर्न सकिन्छ। मैले यसअघि पनि भनेको छु, आप्रवासन एउटा विषय हो। कर कटौती वा करलाई अझ सहज र प्रभावकारी बनाउने विषयमा पनि छलफल गर्न सकिन्छ,’ उनले फ्लोरिडामा पत्रकारहरूसँग भने।
उनले आर्थिक विकाससम्बन्धी धेरै पहलमा दुवै दलले मिलेर काम गर्न सक्ने पनि बताए।
ट्रम्पका अनुसार नवनिर्वाचित केही जनप्रतिनिधिले आफ्ना राज्यसँग सम्बन्धित विषयमा छलफल गर्न उनीसँग भेट्ने इच्छा व्यक्त गरेका छन्। उनले टेक्सास र साउथ क्यारोलिनाका जनप्रतिनिधिको उदाहरण दिए पनि उनीहरूको नाम वा भेटघाटको मिति खुलाएनन्।
यद्यपि, ट्रम्पले आप्रवासन नीतिमा केकस्ता परिवर्तन गर्न सकिन्छ वा करसम्बन्धी कुन प्रस्तावलाई समर्थन गर्ने भन्नेबारे स्पष्ट योजना सार्वजनिक गरेका छैनन्। डेमोक्र्याटहरूले अघि सारेका कुनै विशेष विधेयकलाई पनि उनले समर्थन गरेका छैनन्।
विशेषगरी दक्ष विदेशी कामदारका लागि दिइने एच–वान बी (H-1B) भिसा, रोजगारीमा आधारित ग्रिनकार्ड तथा भारतीय पेसाकर्मी र उनीहरूका परिवारलाई प्रभावित पार्ने अन्य आप्रवासन नीतिबारे पनि उनले कुनै ठोस प्रतिबद्धता जनाएका छैनन्।
विपक्षी दलसँग सहकार्यको प्रस्ताव राखे पनि ट्रम्पले अमेरिकी संसद्मा विधेयकहरू अघि बढ्न नसकेको भन्दै सांसदहरूको आलोचना गरेका छन्। नयाँ संसद् गठन हुनुअघि नै बाँकी रहेका विधेयक पारित गर्न दुवै दलका सांसदलाई आग्रह गरेका छन्।
उनले डेमोक्र्याटहरूले पार्टीगत आधारमा एकै ठाउँमा उभिएर मतदान गर्ने गरेको आरोप लगाउँदै केही रिपब्लिकन सांसदले समेत विधेयक अघि बढाउन अवरोध गरेको बताएका छन्। उनले रिपब्लिकन सिनेटका नेता जोन थुनलाई विधायी प्रक्रिया अघि बढाउन आग्रह गरेका छन्।
त्यसैगरी, संघीय न्यायाधीश तथा राष्ट्रपतिबाट मनोनीत अन्य पदाधिकारीहरूको नियुक्ति प्रक्रिया पनि अघि बढाउनुपर्नेमा उनले जोड दिएका छन्। तर आप्रवासन, कर र आर्थिक विकाससम्बन्धी प्रस्तावमा छलफल गर्ने कुनै निश्चित समयतालिका भने सार्वजनिक गरेका छैनन्।
नोभेम्बर ३ मा सम्पन्न मध्यावधि निर्वाचनमा रिपब्लिकन पार्टीले कमजोर नतिजा बेहोरेको ट्रम्पले स्वीकार गरेका छन्। उनले संसद्मा विधेयक अघि बढ्न नसक्नु र विश्व बजारमा तेलको मूल्य बढ्नुलाई पार्टीको हारका कारणमध्ये एक बताएका छन्। तर आफू निर्वाचनमा उम्मेदवार नभएको भन्दै परिणामबाट आफूलाई अलग राख्ने प्रयास पनि गरेका छन्।
यसैबीच, ट्रम्पले स्टेफन मिलरलाई ह्वाइट हाउसको आगामी चिफ अफ स्टाफ नियुक्त गरेका छन्। निर्वाचनको परिणामपछि प्रशासनभित्र असन्तुष्टि बढेकाले नेतृत्व परिवर्तन गरिएको भन्ने टिप्पणीलाई ट्रम्पले अस्वीकार गरेका छन्। उनले मिलरको निष्ठा र समर्पणको प्रशंसा गरेका छन्।
नोभेम्बर ३ को मध्यावधि निर्वाचनले आगामी जनवरीमा कार्यभार सम्हाल्ने नयाँ अमेरिकी संसद्को संरचना निर्धारण गरेको छ। त्यसअघि पुरानै संसद्ले बाँकी विधेयक पारित गर्ने र राष्ट्रपतिबाट मनोनीत पदाधिकारीहरूको नियुक्ति अनुमोदन गर्ने जिम्मेवारी सम्हाल्नेछ।
