काठमाडौं । नेपालले बंगलादेशमा थप २० मेगावाट विद्युत् निर्यात गर्ने सहमति भएको छ । यो सहमतिसँगै बंगलादेश निर्यात हुने विद्युत ६० मेगावाट पुग्नेछ । नेपालले गत वर्षदेखि नै बंगलादेशमा ४० मेगावाट विद्युत निर्यात गर्दै आइरहेको छ ।
बिहीबार बंगलादेशको ढाकामा सम्पन्न नेपाल–बंगलादेश ऊर्जा सचिवस्तरीय संयुक्त निर्देशक समितिको ७औं बैठकमा नेपालबाट थप २० मेगावाट विद्युत खरिद बिक्री गर्ने विषयमा सहमति जुटेको हो ।
बैठकमा नेपालको तर्फबाट ऊर्जा सचिव चीरञ्जीवी चटौत र बंगलादेशको ऊर्जा सचिव फर्जना ममताजले टोलीको नेतृत्व गरेका थिए ।
सोही बैठकमा सुनकोशी ३ जलविद्युत् आयोजनाको लगानी प्रक्रियामा अगाडि बढाउन बंगलादेशले आयोजना मूल्यांकनका लागि विशेषज्ञ समिति गठन गर्ने, नेपालबाट भारतीय बाटो हुँदै बंगलादेशसम्म प्रसारणलाइन निर्माणको लागि अध्ययन गर्ने र त्रिदेशीय सम्झौता गर्नुपर्ने विषयमा भारतसँग आआफ्नो क्षेत्रबाट पहल गर्ने लगायतका सहमति पनि भएको जनाइएको छ ।
नेपालले बंगलादेशका अलवा भारतमा १२०० मेगावाट हाराहारी विद्युत निर्यात गर्दै आएको छ । आगामी वर्ष नेपालले थप विद्युत निर्यातको स्विकृति पाउन सके नेपालबाट निर्यात हुने विद्युत १३०० मेगावाट नाघ्ने देखिएको छ ।
भारतले नेपालाबाट १० वर्षभित्र १० हजार मेगावाट विद्युत आयात गर्ने सहमति गरिसकेको छ भने बंगलादेशले ९ हजार मेगावाटसम्म विद्युत लिनसकिने बताउँदै आएको छ ।
