काठमाडौँ । अबदेखि चीनको बाटो भएर मुस्ताङ भन्सार कार्यालयबाट पनि आयात गर्न सकिने भएकाे छ । नेपाल राष्ट्र बैंकले मुस्ताङ भन्सार कार्यालयबाट जाँच पास हुने गरी वस्तु तथा सेवा आयात गर्न प्रतीतपत्र खुला गरेको हो ।
राष्ट्र बैंकले विदेशी विनिमय कारोबार गर्ने निकायका लागि जारी गरिएको एकीकृत परिपत्र–२०८१ मा संशोधन गरी चीनतर्फबाट हुने आयात प्रक्रियामा मुस्ताङ भन्सारलाई समावेश गरेको जनाएको छ । बैंकको विदेशी विनिमय व्यवस्थापन विभागले जारी गरेको परिपत्रमा अबदेखि चीनको भूभाग भई ट्रक वा रेलमार्गमार्फत प्रतीतपत्र (एलसी) प्रयोग गरी वस्तु आयात गर्दा तातोपानी र रसुवा भन्सारसँगै मुस्ताङ भन्सारबाट पनि आयात गर्न सकिने जनाइएको छ।
नेपाल राष्ट्र बैंकले विदेशी विनिमय (नियमित गर्ने) ऐन, २०१९ को दफा १२ र नेपाल राष्ट्र बैंक ऐन, २०५८ को दफा ६३ ले दिएको अधिकार प्रयोग गरी यो व्यवस्था गरेको जनाएको छ । यसअघि चीनसँग हुने आयातमा तातोपानी र रसुवा भन्सारबाट मात्र सामान ल्याउन पाइने व्यवस्था थियो भने मंगलबारदेखि तातोपानी, रसुवा र मुस्ताङ तीनै वटै भन्सारबाट आयात गर्न सकिने भएकाे छ।
