काठमाडौं। नेपाल टेलिकमले एनटी फाइबर सेवामा ल्याएको सहुलियतपूर्ण इन्टरनेट प्याकेजपछि ग्राहकको आकर्षण बढेको छ। नयाँ लाइन जडानसम्बन्धी जानकारी लिन र सेवा लिनका लागि प्रयोग हुने १९८ नम्बरमा ग्राहकको चाप बढेपछि कम्पनीले उक्त नम्बरको क्षमता समेत वृद्धि गरेको जनाएको छ।
नेपाल टेलिकमले फाइबर टु द होम (एफटीटीएच) प्रविधिमा आधारित एनटी फाइबर सेवाअन्तर्गत हालै ४ हजार ९९९ रुपैयाँमा ३० एमबीपीएस गतिको इन्टरनेट उपलब्ध गराउने प्याकेज ल्याएको थियो। सहुलियतपूर्ण मूल्यमा इन्टरनेट सेवा उपलब्ध भएपछि ग्राहकको चासो बढेको कम्पनीको भनाइ छ।
एनटी फाइबर जडान गर्न इच्छुक ग्राहकले आवश्यक जानकारी लिन र आफूलाई पायक पर्ने स्थानमा नयाँ लाइन जडानका लागि अनुरोध गर्न १९८ नम्बरमा कल गर्न सक्छन्। उक्त नम्बरमा कल गर्ने ग्राहकको चाप बढेपछि सेवा सहज बनाउन क्षमता विस्तार गरिएको कम्पनीले जनाएको छ।
टेलिकमले ग्राहकको सुविधाका लागि अनलाइनबाटै एनटी फाइबर जडानसम्बन्धी विवरण उपलब्ध गराउन र गुनासो दर्ता गर्न सकिने व्यवस्था पनि गरेको छ। यसका लागि ग्राहकले https://complain.ntc.net.np/ मा लगइन गरी नेपाल टेलिकमको मोबाइल नम्बरमार्फत आवश्यक विवरण उपलब्ध गराउन सक्नेछन्।
कम्पनीले एनटी फाइबरअन्तर्गत ३० एमबीपीएसको प्याकेजसहित अन्य विभिन्न इन्टरनेट प्याकेजसमेत उपलब्ध गराउँदै आएको छ। ग्राहकले आफ्नो आवश्यकता र सुविधाअनुसार उपलब्ध प्याकेज छनोट गर्न सक्नेछन्।
