काठमाडौँ। नागरिकलाई घरमै बसेर जग्गासम्बन्धी सेवा उपलब्ध गराउने उद्देश्यले नापी विभागले ‘मेरोकित्ता’ मोबाइल एप सार्वजनिक गरेको छ। भूमि व्यवस्था, सहकारी संघीय मामिला तथा सामान्य प्रशासन मन्त्री प्रतिभा रावलको उपस्थितिमा एक कार्यक्रमका बीच यो एप औपचारिक रूपमा सार्वजनिक गरिएको हो।
यो एप सार्वजनिक भएसँगै अब जग्गासम्बन्धी साधारण सेवा लिनका लागि पनि नापी कार्यालय धाइरहनुपर्ने बाध्यताको अन्त्य भएको छ।
नापी विभागका अनुसार यो एप मोबाइल प्रयोगकर्ताका लागि एन्ड्रोइड र आईओएस दुवै प्लेटफर्ममा उपलब्ध गराइएको छ। सेवाग्राहीले यसलाई गुगल प्ले स्टोर र एप्पल एप स्टोरबाट सजिलै डाउनलोड गरेर प्रयोग गर्न सक्नेछन्। मोबाइल एपका साथै यसको वेब संस्करण (वेबसाइट) पनि सञ्चालनमा रहेको विभागले जनाएको छ।
एपबाट पाइने मुख्य सेवाहरू
‘मेरोकित्ता’ एपमार्फत सेवाग्राहीले निम्न सेवाहरूका लागि अनलाइनबाटै आवेदन दिन सक्नेछन्।
जग्गाको नक्सा प्रिन्ट
फिल्डबुक उतार
प्लट रजिस्टर उतार
फिल्ड रेखांकन
आवेदन दर्ता भएपछि प्रणालीले सेवाग्राहीको मोबाइलमा एउटा ओटीपी पठाउनेछ। उक्त मोबाइल नम्बर र ओटीपी प्रयोग गरेर सेवाग्राहीले आफ्नो आवेदनको अवस्था कस्तो छ भनी नियमित रूपमा हेर्न सक्नेछन्।
राजस्व भुक्तानी पनि अनलाइनबाटै
सेवालाई पूर्ण रूपमा डिजिटल बनाउन एपमा डिजिटल वालेट र भुक्तानी प्रणालीलाई जोडिएको छ। सेवाग्राहीले फिल्ड रेखांकन लगायतका सेवाका लागि आवश्यक पर्ने राजस्व ईसेवा, खल्ती र कनेक्ट आईपीएसमार्फत अनलाइनबाटै तिर्न सक्ने व्यवस्था मिलाइएको छ।
यसका साथै, एपभित्रै सम्बन्धित नापी कार्यालयका कार्यालय प्रमुख तथा सूचना अधिकारीको सम्पर्क नम्बरसमेत उपलब्ध गराइएको छ, जसले गर्दा नागरिकलाई सञ्चार गर्न थप सहज हुनेछ।
डिजिटल सुशासन सरकारको प्राथमिकता: मन्त्री रावल
एप सार्वजनिक गर्दै मन्त्री प्रतिभा रावलले सूचना प्रविधिको प्रयोगमार्फत सार्वजनिक सेवामा नागरिकको पहुँच विस्तार गर्नु सरकारको मुख्य प्राथमिकता रहेको बताइन्।
‘जग्गासम्बन्धी सेवा लिन सेवाग्राहीले कार्यालय धाउनुपर्ने बाध्यता क्रमशः अन्त्य हुँदै गएको छ,’ मन्त्री रावलले भनिन्, ‘‘मेरोकित्ता’ एपले सेवा प्रवाहलाई थप सहज, छरितो, पारदर्शी र प्रभावकारी बनाउनेछ।’ उनले डिजिटल सुशासनलाई सुदृढ बनाउन आगामी दिनमा यस्ता प्रविधिमैत्री सेवाहरूलाई थप विस्तार गर्दै लैजाने प्रतिबद्धता समेत व्यक्त गरिन्।
