काठमाडौं । आन्तरिक राजस्व विभागले विद्युत् आपूर्ति सहयोगी प्रणाली (पावर ब्याकअप सिस्टम) खरिद गर्न राष्ट्रियस्तरको बोलपत्र आह्वान गरेको छ। विभागले कात्तिक १७ गते सूचना प्रकाशित गर्दै इच्छुक फर्म, संस्था तथा कम्पनीबाट बोलपत्र माग गरेको हो।
विभागले ठेक्का नम्बर आइआरडी/एनसीबी/जी/२०८३–८४/०२ अन्तर्गत एक चरण, दुई खाम प्रक्रियाबाट खरिद अघि बढाउन लागेको हो।
मंसिर ८ गतेसम्म बोलपत्र फाराम खरिद गर्न सकिने
बोलपत्रमा सहभागी हुन इच्छुक कम्पनी तथा फर्मले आन्तरिक राजस्व विभागको सामान्य प्रशासन शाखा, लाजिम्पाट वा आन्तरिक राजस्व कार्यालय, महाराजगञ्जको लेखा शाखाबाट फाराम खरिद गर्न सक्नेछन्।
फाराम खरिदका लागि लिखित निवेदन र फर्म वा कम्पनी दर्ताको प्रमाणपत्रको प्रतिलिपि पेस गर्नुपर्नेछ। बोलपत्र फारामको दस्तुर ३ हजार रुपैयाँ तोकिएको छ। उक्त रकम फिर्ता हुने छैन।
फाराम दस्तुर राष्ट्रिय वाणिज्य बैंकमा रहेको आन्तरिक राजस्व विभाग, लाजिम्पाटको खातामा जम्मा गर्नुपर्नेछ। फाराम खरिद गर्ने अन्तिम मिति २०८३ मंसिर ८ गते तोकिएको छ।
मंसिर ९ गते बोलपत्र खोलिने
विभागका अनुसार बोलपत्र पेस गर्ने अन्तिम मिति मंसिर ९ गते दिउँसो १२ बजे हो। बोलपत्रदाता कम्पनीले सिलबन्दी बोलपत्र विभागको कार्यालय, लाजिम्पाटमा आफैँ उपस्थित भएर वा हुलाक तथा द्रुत सेवामार्फत पठाउन सक्नेछन्।
निर्धारित समयपछि प्राप्त हुने बोलपत्र स्वीकार गरिने छैन। प्राप्त बोलपत्र सोही दिन दिउँसो २ बजे विभागको कार्यालयमा खोलिनेछ। बोलपत्रदाता कम्पनीका प्रतिनिधि बोलपत्र खोल्ने समयमा उपस्थित हुन सक्नेछन्। बोलपत्र पेस गर्नुअघि कुनै पूर्व-बोलपत्र बैठक आयोजना नगरिने विभागले जनाएको छ।
५५ हजार रुपैयाँ जमानत राख्नुपर्ने
बोलपत्र पेस गर्ने कम्पनीले कम्तीमा ५५ हजार रुपैयाँ बराबरको बोलपत्र जमानत पेस गर्नुपर्नेछ। बोलपत्रको वैधता अवधि दाखिला गर्ने अन्तिम मितिदेखि ९० दिनको हुनुपर्नेछ। जमानतको वैधता भने बोलपत्रको वैधता अवधिभन्दा थप ३० दिन बढी हुनुपर्ने व्यवस्था छ।
नगद जमानत राख्ने कम्पनीले राष्ट्रिय वाणिज्य बैंकमा रहेको जिल्ला कोष तथा लेखा नियन्त्रक कार्यालय, लैनचौर, काठमाडौंको खातामा रकम जम्मा गरी भौचर बोलपत्रसँगै पेस गर्नुपर्नेछ।
बोलपत्र फाराम खरिद वा दाखिला गर्ने अन्तिम दिन सार्वजनिक बिदा परेमा त्यसपछिको पहिलो कार्यदिनलाई अन्तिम मिति मानिनेछ। यस्तो अवस्थामा बोलपत्र र जमानतको वैधता अवधि भने सूचनामा उल्लेख गरिएको मूल मितिका आधारमा कायम रहनेछ।
बोलपत्रसम्बन्धी थप जानकारीका लागि आन्तरिक राजस्व विभागको सामान्य प्रशासन शाखामा सम्पर्क गर्न सकिनेछ। विभागको सम्पर्क नम्बर ०१-५९७००८१, विस्तार २३७ रहेको छ। विस्तृत सूचना विभागको आधिकारिक वेबसाइट www.ird.gov.np मा उपलब्ध छ।
